നിരീക്ഷണം

നിന്റെ തലച്ചോറിൽ നിന്ന്
ഒരു കമ്പിയില്ലാ കമ്പി
രാജകൊട്ടാരത്തിലേക്ക്
വലിച്ചു നീട്ടിയിട്ടുണ്ട്

നിന്റെ ചിന്തകൾ
നിന്റെ വാക്കുകൾ
നിന്റെ ചങ്ങാത്തങ്ങൾ
നിന്റെ പ്രണയങ്ങൾ

എല്ലാം ചോർത്തപ്പെടും
രാജ്യം നിന്നെ ഉറ്റുനോക്കുന്നു
ഒന്നിനുമല്ല, നിനക്ക് വേണ്ടി
നിന്റെ ഭാവിക്കരുപ്പിടിപ്പിക്കാൻ

ചെരുപ്പ്

അങ്ങിനെ ഉറക്കം ഉണര്‍ന്നു, കാലത്തെഴുന്നേല്‍ക്കുന്നത് എത്ര വേദനാജനകം, വിശപ്പ് മെല്ലെ പൊതിയും, പിന്നെ വരിഞ്ഞ്മുറുക്കും. വൈകി ഉണര്‍ന്ന് നേരത്തെ ഉറങ്ങുകയാണിപ്പോള്‍. ചാക്കോചേട്ടന്‍ കടതുറക്കും വരെ മാത്രമുള്ള വൈകല്‍. പെട്ടെന്നുതന്നെ കൈകള്‍ ചെരുപ്പിനു വേണ്ടി പരതി.   വെറുംകാലുകൊണ്ട് നിലംചവിട്ടി മാത്രുഭൂമിയെ നിന്ദിക്കരുതെന്ന് മാഷ് പറഞ്ഞത് ഓര്‍ത്തു.ഒന്ന്  അപ്പുറത്ത് റോഡിനടുത്ത് മറ്റേത് മാലിന്യഭണ്ഡാരത്തിനടുത്ത്, അതെ മാലിന്യ ഭണ്ഡാരമാണ്, കാരണം ജനാധിപത്യവും രാജ്യസുരക്ഷയെക്കുറിച്ച് ബോധവുമുള്ള പൊതുസമൂഹം അവിടെയാണ് മുകളില്‍ ദാരിദ്ര്യരേഖകാണുക പോലും ചെയ്യാത്തവര്‍ക്കുള്ള അന്നം നിക്ഷേപിക്കുക  എല്ലാ പൌരനും നിക്ഷേപങ്ങള്‍ ഉണ്ടല്ലൊ..

ചെരുപ്പിലേക്ക് തന്നെ വരാം, ഇന്നലെ കോളാമ്പികെട്ടി ആരോ പറയുന്നതുകേട്ടു യുവനേതാവിനെ ആരോ ചെരുപ്പെറിഞ്ഞെന്ന്. വ്രുത്തികെട്ടവന്‍, ഒന്നുമില്ലെങ്കില്‍ ഒരു ജാനാധിപത്യ രാജ്യമല്ലെ, അതെങ്കിലും ഓര്‍ത്തോ ആ കഴുത. ദിനവും പട്ടിണികിടക്കുന്നവനില്ലാത്ത കുര അവന്. ഒക്കെ നാടകമാണെന്ന് ആ ഖദറുകാരന്‍ അന്‍പത് പൈസാ തന്ന് പറഞ്ഞു.  ഈ ഭൂമിയില്‍ എല്ലാം ചെരുപ്പെറിഞ്ഞാല്‍ തീരുന്ന പ്രശ്നങ്ങളാണോ? അന്യനാട്ടിലെ ആളുകളെക്കൊണ്ട്  നാടിനെ പറയിപ്പിക്കാന്‍.

ചെരുപ്പെന്നുപറയാന്‍ ഒന്നുമില്ല, മാലിന്യ ഭണ്ഡാരത്തില്‍ നിന്നെടുത്തതാണ് മാഷ് മാതൃഭൂമിയെക്കുറിച്ച് പറഞ്ഞ ഒരു നാള്‍. അതിനു ചാക്കുവള്ളികൊണ്ടൊരു വാറും കെട്ടി. കാലിലെ അഴുക്ക് ഭാരതമാതാവിന് മേല്‍ പതിക്കുന്നത് പാപം തന്നെ.

ആ മുരടന്‍ നായ പറ്റിച്ച പണിയാണ്, ഇന്നലെ കിടക്കുമ്പോള്‍ അരികിലുണ്ടായിരുന്നു. ചെരുപ്പിടുന്നവരെ അവനു തീരെ ഇഷ്ടമില്ല. നായക്കെന്ത് രാജ്യസ്നേഹം. പക്ഷെ അവനെ എല്ലാവര്‍ക്കും പേടിയാണ്. ചാക്കോ ചേട്ടന്‍ പീടികതുറക്കാന്‍ വരുമ്പോള്‍ ഒരു മുട്ടന്‍ വടിയുമായി വരും. അവനെ പേടിച്ചാണ്. വല്യ ധൈര്യശാലിയെന്നൊക്കെയാണ് ഭാവം, ഓടടാ എന്നേ പറയൂ., ഇവിടത്തെ അന്തേവാസികള്‍ ഓടും. ഇത് അയാളുടെ പീടികയല്ലെ. ഇടക്ക് പീടികയും ചുറ്റുവട്ടവും കഴുകാന്‍ വെള്ളം കോരിക്കൊടുക്കും. അതുകൊണ്ട് ഇവിടെ കിടക്കാന്‍ അനുവദിക്കുന്നത്. കിടക്കാന്‍ എന്നുപറഞ്ഞാല്‍ പീടികയുടെ കോലായിലല്ല, അവിടെ കിടക്കുന്നത് അങ്ങേര്‍ക്ക് ഇഷ്ടമല്ല. അതിന്റെ നീണ്ട ചവിട്ടു പടിയില്‍. കിടക്കാന്‍ ഒരിടവുമില്ലാത്ത എത്ര പേരുണ്ട്. ഇവിടെ ഈ ചവിട്ടുപടിയുണ്ടല്ലൊ. പക്ഷെ ചാക്കോ ചേട്ടന് രാജ്യസ്നേഹം തീരെയില്ല. പീടിക്കകത്ത് ചെരു

പ്പിടില്ല. അതെന്തുകൊണ്ടാണെന്ന് മാഷോട് ചോദിച്ചപ്പൊ മാഷ് പറഞ്ഞു, ചാക്കോക്ക് എന്ത് രാജ്യസ്നേഹം. അവരെല്ലാം വരത്തരല്ലെയെന്ന്.. 

ഇന്നലെ മാഷുടെ വീട്ടില്‍ പൂന്തോട്ടം നനക്കാന്‍ പോയി. മാഷ് പറഞ്ഞത് ചെടികള്‍ക്ക് നനക്കുന്നത് മനസ്സില്‍ സന്തോഷം തരുമെന്നാണ്,  എല്ലാം നനച്ചുകഴിഞ്ഞപ്പോള്‍ മാഷ് പറഞ്ഞു. നാം നമ്മെക്കുറിച്ച് മാത്രമാണ് ഓര്‍ക്കുന്നത. മാഷ് തികഞ്ഞ ദാര്‍ശനികന്‍ തന്നെ.

മുന്‍പും ഈ മുരടന്‍ നായ ചെരുപ്പ് നീക്കിയിടാറുണ്ടായിരുന്നു, അപ്പോള്‍  ഊന്നുവടികൊണ്ടാണ് തട്ടിയെടുത്തിരുന്നത്.  ഇന്നലെ മാഷിന്റെ വീട്ടിലെ  നിലംപൊത്താന്‍ നില്‍ക്കുന്ന ഒരു വാഴക്ക് ആ ഊന്നുവടികൊണ്ട് ഒരു ഊന്നുകൊടുത്തു. 

അതാ മുരടന്‍ നായ! ചക്കോച്ചന്‍ അലറിവിളിക്കുന്നുണ്ട്. അതു തന്നെ, ചാക്കോച്ചന്റെ കയ്യില്‍ നിന്ന് അയാളുടെ പൊതിച്ചോറ് തട്ടിപ്പറിച്ചു കൊണ്ടോടി. ഇടക്കിടെ അവന്‍ ഇതു ചെയ്യും, അത് ചാക്കോച്ചനോട് മാത്രമല്ല. മാഷോട് പോലും. ഒരിക്കല്‍ മിനിസിപാലിറ്റിക്കാരന്‍ നായപിടിയനെ കൊണ്ടുവന്നു നായയെപിടിക്കാന്‍. കുറെ എല്ലുംകഷണം നിലത്തിട്ട് അതെടുക്കാന്‍ വരുംനേരം പിടിക്കാന്‍. അതുണ്ടോ വരുന്നു. അശ്രീകരം. മുനിസിപ്പാലിറ്റി നായക്കാരന്‍ അന്ന് തോറ്റുതൊപ്പിയിട്ടു.

ഈ കാര്‍ ഡ്ബോര്‍ഡ് ചട്ടയില്‍ നിന്ന് നിലത്ത് കാല്‍ വെക്കാന്‍ വയ്യ,  ചാക്കോ ചേട്ടന്‍ ഈര്‍ശ്യത്താല്‍ തെറിവിളിക്കുന്നുണ്ട്, ചന്തിയില്‍ നിരങ്ങി നീങ്ങി ചെരുപ്പുകള്‍ ധരിച്ചപ്പോള്‍ സമാധാനമായി.  എന്നാലും വയര്‍ പട്ടിണിയാലൊട്ടി എരിഞ്ഞുകൊണ്ടേയിരുന്നു.

വന്ദേമാതരം.

ജന്മദിനം

എന്റെ ഉമ്മക്ക്

ദിനഗണിതങ്ങൾ

അറിയുമായിരുന്നില്ല

ആയതിനാൽ

എന്റെ ജന്മദിനം

അറിയപ്പെടാത്ത

ചരിത്രമായി

കുടുക്കും മൂടും പൊട്ടിയ

ട്രൗസറിന്റെ ഗമയിൽ

ഉസ്കൂളിൽ ചേരാൻ

വരിയിൽ നിന്നദിനം

റുക്കിയടീച്ചറുടെ

ചോദ്യത്തിനും

ഉപ്പയുടെ ഉത്തരംമുട്ടലിനും

ലസാഗുവിട്ട്

ഏഡ്മാഷെനിക്ക്

ജന്മദിനം സമ്മാനിച്ചു

"മെയ് ഇരുപത്തിയഞ്ച്"

മുഖപുസ്തകത്തില്‍ വസന്തം വരുന്നത്...

പട്ടിണിപ്പാവത്തിന്റെ ഒട്ടിയവയര്‍
കാലടിയില്‍ ഒടുങ്ങുന്ന അടിയാളന്‍
 നീതിവിധിക്കുന്ന കണ്ണ് മൂടിക്കെട്ടിയ ദൈവങ്ങൾ

പങ്ക് പറ്റും വരെ തെരെഞ്ഞെടുക്കപ്പെട്ടവന്റെ സമരം
സമരസപ്പെടലുകളുടെ അനീതിയുടെ ഐകമത്യം

പ്രണയത്തിന് പിറകെ പോയ പൂമ്പാറ്റകൾ
തെരുവിൽ ചപ്പുചവറുകൾക്കിടയിൽ ചിറകരിഞ്ഞ്
ഓരോ ദിനപത്രവും ഓരോ ഓർമ്മപ്പെടുത്തലുകൾ 
അനിവാര്യമായ പോരാട്ടത്തെ അടയാളപ്പെടുത്തുന്നു

ദിനചിത്രങ്ങള്‍ നിങ്ങളെയും ഭ്രാന്തുപിടിപ്പിക്കുന്നില്ലെ?

ഫൈസ്ബൂക്കില്‍ സ്റ്റാറ്റസ് കുറിച്ചപ്പോൾ
ഒത്തു നിൽക്കുവാൻ ഒരായിരം പേർ

അതെ വസന്തം പൂത്തു വിടരുകതന്നെ ചെയ്യും
പഴക്കച്ചവടക്കാരന്റെ കരിഞ്ഞശവം

തെരുവില്‍ വീഴും മുന്‍പെ

കര്‍ഷ്കന്റെ ഒരു ജഡം കൂടി തൂങ്ങും മുന്‍പെ

പടിഞ്ഞാറെ ചത്വരത്തില്‍ നിന്ന്
ഒരു മഹാസമുദ്രമായി, കോട്ടകൊത്തളങ്ങള്‍ തകര്‍ത്ത്
കിങ്കരന്മാര്‍ക്ക് മുന്നില്‍ പതറാതെ...

ഏവരും പ്രതീക്ഷിക്കുന്നുണ്ട് ഒരാള്‍ തുടങ്ങണമെന്ന്

കാത്തിരീക്കാനാകാത്ത ഒരു ജനത പടിഞ്ഞാറെ ചത്വരത്തിൽ,

ഇന്നത്തെ സന്ധ്യ പുതിയ തുടക്കമാണ്

സമനീതിയുടെ അതിജീവനത്തിന്റെ....

പക്ഷെ, നേരമിരുട്ടി രാത്രിയായി  ആരും വന്നില്ല
പടിഞ്ഞാറെ ചത്വരം വിജനമായിക്കിടന്നു 
ഇടക്കിടെ പോലീസ് വണ്ടിയുടെ ഇരമ്പല്‍ മാത്രം

വിഫലവിപ്ളവത്തിന്റെ നിരാശയില്‍
വീണ്ടും മുഖപുസ്തകം തുറന്ന് നോക്കി 
അവസാനത്തെ കമന്റുകാരന്റെ പുതിയ പോസ്റ്റ്
"വൊഡാഫോൺ  കോമഡി ഷോ"

DEMOക്രസി

ഓരോ തിരഞ്ഞെടുപ്പിനൊടുവിലും

മൂലക്കുരു പൊട്ടിയൊലിക്കുന്നതുപോലെ

മഷിയൊലിക്കുന്ന  വിരല്‍

കര്‍മ്മഫലമെന്ന് വിധിച്ച്
ഓരോ വീതം വെക്കലിനും ശേഷം
ഞാന്‍ കൂരയിലേക്ക് മടങ്ങുന്നു.

എന്റെ രാഷ്ട്രീയം മാരത്തോണില്‍
വീണുപോയ ഓട്ടക്കാരന്റെതുപോലെ
ഒറ്റക്കാലനും ഏറെ മുന്നിലെത്തിയിരിക്കുന്നു

ആസനത്തില്‍ ആല്‍ മുളച്ചവരെ കണ്ടു
അവര്‍ അതിന്റെ തണലില്‍
ചെറുകാറ്റിന്റെ ഊഷ്മളതയിൽ

എന്നാലും ചിരിക്കുന്നില്ലെങ്കിലും
ചിരിച്ചെന്നുവരുത്താനുള്ള
എന്റെ അവകാശം ഞാന്‍ ഇഷ്ടപ്പെടുന്നു

എന്നാലും എന്റെ വാക്കുകള്‍
വാക്കുകളായി ശേഷിക്കുന്നതിനാല്‍
ഞാന്‍ ഇത് ഇഷ്ടപ്പെടുന്നു